О блаженная и причестная и благодати Святаго Духа исполненная главо, сосуде избранный Святыя Троицы, преподобне отче наш Кирилле, услыши нас, грешных, предстоящих ныне пред тобою и умильно молящих тя: помолися о нас, рабех твоих, ко Всемилостивому Владыце Иисусу Христу Богу нашему и Его рождшей Матери, владычице нашей Богородице и Приснодеве Марии, еже отпустити нам согрешения наша, яже содеяхом. Вемы бо, отче наш, аще плотию и в персти почиваеши, но духом зде с нами неотступно и невидимо пребываеши, назирая нас и назидая по твоему неложному обещанию, сохраняеши от всяких обстоятельств. И якоже много дерзновение стяжавый ко Господу постническими твоими подвиги, умоли Его святыми твоими молитвами подати миру мир, Церкви Его Святей — единомыслие, стране — на враги победу, служащим же ти — друг ко другу любовь и согласие и всем людям, притекающим к тебе с верою, испроси у Господа к пользе душевной и телесной милость, мир, благословение, воеже избавитися нам всем в День Судный страшный, шуия части спастися, стати же одесную со избранными Его к наследию Царствия Небеснаго, яко Тому подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне, и присно, и во веки веков. Аминь.